Biztanleria Aktiboaren Inkestak dionaren arabera, urteko bigarren hiruhilekoan 12.600 lanpostu sortu ziren oro har, Hego Euskal Herrian. Horrek esan nahi du aurreko hiruhilekoko datuekin alderatuta okupazioa %1 igo dela. Hala ere, Nafarroan enplegua daukan pertsona kopurua oso gutxi igo da, %0,2 bakarrik.
Hazkundea eskastzat jo daitekeen arren, kontuan izanda euskal ekonomia pairatzen ari den etengabeko dezelerazioa datua garrantzitsua dela esan dezakegu. Dena dela, argi dago Euskal Herriko ekonomia eta enpleguaren garapenak inguruko herrialdeetakoek baino hobe egiten diola aurre mundu mailan gertatzen ari den ralentizazio eta egoera nahasiaren ondorioei.Era berean, Hegoaldean aurtengo bigarren hiruhilekoan langabeziak behera egin du %1,5 eta aurreko hiruhilekoan baino 1.200 pertsona gutxiago daude langabezian. Baina urteko lehenengo sei hilabeteetan 3000 pertsona gehiago dira langabezian daudenak. Beraz, urte amaierako datuekin erkatuz gero, langabezi tasa %4,1 igo da.
Lan merkatuari buruzko irakurketa triunfalistarik, ordea, ezin daiteke egin. Egin beharrekoa, aldiz, klima ekonomikoaren kaskartzeak izan ditzazkeen ondorioak arretaz zaintzea da; izan ere hazkunde ekonomikoaren erritmoa murrizteak ondorio kaltegarriak izan baititzake enpleguarengan.
Testuinguru honetan, Europako Banku Zentralak interes-tasak igoz bultzatutako diru-politika gogortzeak etxeko ekonomiak estutuz eta enpresen inbertsio produktiboa oztopatuz egoera okertzen ari dira.
Azken batez, prekarietatea, aldi baterakotasun tasa altuak eta ezbehar-tasa ikaragarriak nagusi diren laneko panorama iluntzera dator honezkero aurreikusi daitekeen langabeziaren igoera.
